Müqəddəs Ramazan ayı münasibəti ilə iftar süfrəsi açıldı.

29 iyun 2016-cı il tarixində Qaradağ rayonu, Lökbatan qəsəbə məscidinin həyətində Qaradağ Rayon İcra Hakimiyyəti tərəfindən iftar süfrəsi açıldı.

Dindarların, şəhid ailələrinin, kimsəsizlərin, habelə rayon ictimaiyyəti nümayəndələrinin iştirak etdiyi məclisi Lökbatan qəsəbə məscidinin axundu Hacı Faiq açaraq Müqəddəs Ramazan ayı haqqında məclis üzvlərinə müəyyən məlumatlar verdi, dualar oxundu və dindarlar adından tədbiri təşkil edən rayon rəhbərliyinə təşəkkürünü bildirdi. İftar mərasimində Müqəddəs Ramazan ayının əhəmiyyətindən danışılaraq, milli-mənəvi həmrəyliyin, saflıq və mərhəmətin rəmzi olan bu ayda xalqımıza əmin-amanlıq və duaların qəbul olunması arzulandı.
Tədbirdə iştirak edən Qaradağ Rayon İcra Hakimiyyəti başçısının birinci müavini cənab Emil Abbasov çıxış edərək rayon sakinlərini Qaradağ Rayon İcra Hakimiyyəti başçısı cənab Süleyman Mikayılov adından Müqəddəs Ramazan ayı münasibəti ilə təbrik edərək, tutduqları orucun Allah dərgahında qəbul olunmasını arzu etdi.
Sonra Milli Məclisin deputatı, YAP Qaradağ rayon təşkilatının sədri Aydın Hüseynov çıxış edərək ölkəmizdə dövlət səviyyəsində milli-mənəvi dəyərlərə göstərilən diqqət və qayğıdan geniş danışaraq məscidlərin, pirlərin, ziyarətgahların təmirinə və yenidən qurulmasına xüsusi əhəmiyyət verildiyini, Azərbaycan Respublikasının Prezidenti cənab İlham Əliyevin yürütdüyü siyasət nəticəsində ölkəmizin dini tolerantlıq baxımından bütün dünyaya nümunə olduğunu vurğuladı.
Bundan başqa Müqəddəs Ramazan ayı boyunca rayonun digər qəsəbələrində də iftar süfrələri açılmışdır.