27 sentyabr Anım günü ilə bağlı ümumrayon tədbiri keçirildi

   Lökbatan qəsəbəsi Heydər Əliyev Mərkəzində 27 sentyabr Anım günü ilə bağlı ümumrayon tədbiri keçirildi. 
   Tədbirdə Qaradağ Rayon İcra Hakimiyyətinin başçısı, şəhid ailələri və qazilər, rayon icra hakimiyyətinin rəsmiləri, ictimaiyyət nümayəndələri iştirak edirdi. 
   Foyedə Şəhid Hüseynli Türkayın atası Nizami Hüseynovun kitab təqdimatı və 5 nömrəli Uşaq İncəsənət Musiqi məktəbinin şagirdlərinin rəsm işləri sərgiləndi. 
   Respublikamızın ərazi bütövlüyünün qorunması, bərpası və torpaqlarımızın işğaldan azad edilməsi uğrunda döyüşlərdə şəhidlik zirvəsinə ucalan Vətən övladlarının xatirəsinə bir dəqiqəlik sükut elan edildi. Daha sonra Dövlət himni ifa olundu. 
   “Anım Günü”nə həsr olunmuş tədbirdə Qaradağ Rayon İcra Hakimiyyətinin başçısı cənab Süleyman Mikayılov 27 sentyabr 2020-ci il tarixində başlayan Vətən müharibəsinin Azərbaycanın tarixi qələbəsi ilə başa çatdığını, noyabrın 10-da Azərbaycan, Rusiya prezidentlərinin və Ermənistan baş nazirinin imzaladıqları üçtərəfli bəyanatla münaqişəyə son qoyulduğunu, bu, sənədin həmçinin Ermənistanın kapitulyasiya aktı olduğunu, Azərbaycanın öz torpaqlarını işğaldan azad edərək, həm tarixi ədaləti, həm də ərazi bütövlüyünü bərpa etdiyini diqqətə çatdırıb.   
   Azərbaycan Respublikasının Prezidenti İlham Əliyevin 02 dekabr 2020-ci il tarixli Sərəncamı ilə hər il sentyabrın 27-si Azərbaycan Respublikasında “Anım Günü” kimi qeyd edilməsi qərara alınmışdır. 
   Ali Baş Komandan cənab İlham Əliyevin rəhbərliyi altında aparılan əks-hücum əməliyyatlarında qaradağlılar da böyük şücaət və əzmkarlıq nümunələri göstərmişdi. Vətən müharibəsində Qaradağ rayonu üzrə 2514 nəfər iştirak etmiş, onlardan 46 nəfəri şəhidlik zirvəsinə yüksəlmiş, 157-si yaralanmış, 65 nəfər əlillik dərəcəsi almışdır.    
   Ərazilərin işğaldan azad olunması zamanı hərbi əməliyyatlarda iştirak edərək igidlik və şücaət nümayiş etdirmiş, vəzifə borcunu ləyaqətlə və vicdanla, döyüş tapşırıqlarını uğurla yerinə yetirmiş Silahlı Qüvvələrimizin hərbi qulluqçuları Prezident cənab İlham Əliyevin sərəncamları ilə “Vətən Müharibəsi Qəhrəmanı” adı, müxtəlif orden və medallarla təltif olunmuşlar.     
    Prezident Cənab İlham Əliyev Vətən müharibəsində şəhidlik zirvəsinə ucalanların ailə üzvlərinə, qüdrətli Azərbaycan Ordusunun hərbçilərinə, qazilərinə daim xüsusi diqqət və qayğı göstərir. Bu qəbildən olan vətəndaşlarımızın sosial müdafiəsinin möhkəmləndirilməsi, o cümlədən mənzil, fərdi ev və avtomobillərlə təmin edilməsi istiqamətində həyata keçirilən kompleks tədbirlər bunun bariz nümunəsi olduğunu bildirmişdir. 
   Bu şanlı Qələbənin Azərbaycanın dövlətçilik tarixində yeni bir mərhələnin, yeni dövrün başlanğıcı olduğunu bildirən rayon icra hakimiyyətinin başçısı vurğulayıb ki, Prezident İlham Əliyevin qeyd etdiyi kimi, bu dövr inkişaf, təhlükəsizlik, tərəqqi dövrüdür.          
   Prezident İlham Əliyevin Şuşa şəhərinə və işğaldan azad olunmuş digər şəhər və rayonlarımıza səfərləri, həmin səfərlər çərçivəsində çox mühüm tədbirlərdə iştirakı, açılış və təməlqoyma mərasimlərinin keçirilməsi bir daha Azərbaycan dövlətinin gücünü və qüdrətini hər kəsə nümayiş etdirir.     
   Əlbəttə, zaman ötdükcə dövlətimizin və ordumuzun bu tarixi Qələbəsinin bütün tariximizi, milli varlığımızı, dövlətçilik ənənələrimizi, fiziki və mənəvi dünyamızı necə dəyişdiyinin daha çox fərqində olacaq, bunu daha ətraflı dərk edəcəyik. Vətəni canından əziz tutanlar heç vaxt unudulmayacaq.   
   “Anım Günü”nə həsr olunmuş  Tədbirdə rayon ziyalısı, tarixçi Taleh Quliyev çıxış edərək qeyd etmişdir ki, bu gün 27 sentyabr Dağlıq Qarabağ münaqişəsinin tərkib hissəsi olan ikinci Qarabağ müharibəsinin başlandığı gündür. Bu gün ölkə başçısı tərəfindən Anım günü kimi qeyd olunması haqqında sərəncam verildi. Ümid edirik ki, bu artıq Dağlıq Qarabağ münaqişəsinin sonuncu mərhələsi olacaqdır.
   2020-ci il tarixində Azərbaycan Respublikasının Prezidenti, Müzəffər Ali Baş Komandan cənab İlham Əliyevin 30 il davam edən erməni işğalına qarşı başlatdığı Vətən müharibəsi, 44 gündən sonra Zəfərlə başa çatdı.  Bu qələbəmiz asan başa gəlmədi. Çoxlu sayda şəhidlər verdik, möhtərəm Ali Baş Komandanımızın Dəmir Yumruq əməliyyatı sonda öz nəticəsini verdi və torpaqlarımız işğaldan azad edildi. 
   Müzəffər sərkərdəmiz cənab İlham Əliyevin düşünülmüş strategiyası, siyasi iradəsi və qətiyyəti sayəsində Azərbaycan ordusunun canı-qanı bahasına torpaqlarımız işğaldan azad olundu, Azərbaycan Vətən Müharibəsində böyük Zəfər qazandı. Özünün Vətən Müharibəsi ilə Azərbaycan regionda yeni reallıq yaratdı. 44 günlük müharibə Azərbaycanın tam qələbəsi və Ermənistanın kapitulyasiyası ilə nəticələndi.  
   Daha sonra Şəhid Hüseynli Türkayın atası Hüseynov Nizami çıxış edərək qeyd etdi ki, Vətən Müharibəsinin ilk günlərindən  hərbi əməliyyatlarda övladı Hüseynli Türkay də iştirak etmiş, igidlik, şücaət nümayiş etdirərək şəhidlik zirvəsinə ucalmışdır. Müzəffər Ali Baş Komandan cənab İlham Əliyevin Vətən müharibəsi iştirakçılarına, o cümlədən Şəhid Türkayın xidmətlərinə  yüksək qiymət verdiyini bildirdi. Prezident cənab İlham Əliyevin müvafiq sərəncamları ilə “Vətən Uğrunda”, “Cəbrayılın azad olunması”  medalları ilə və “Rəşadət” ordeni ilə təltif olunmuşdur.         
   Sonra Şəhid İsmayılzadə Səməndər Vahid oğlunun anası İsmayılova Fəridə çıxışında, ölkəmizdə olduğu kimi Qaradağ rayonunda da Prezident cənab İlham Əliyev tərəfindən  şəhidlərimizə, onların ailə üzvlərinə və qazilərə olan qayğının hər zaman yüksək səviyyədə olduğu qeyd etdi və dövlət qayğısını həmişə hiss etdiklərini bildirdi.  
  Vətənə böyük sevgiləri olan belə qəhrəmanların ömür yolu gənclərin vətənpərvərlik ruhunun formalaşmasında müstəsna rol oynayır. Qəhrəmanlıqları ilə dastan yazan igid oğullarımızı yad etmək, xatırlamaq, gələcək nəsillərə çatdırmaq hər birimizin üzərinə düşən ən müqəddəs vəzifə olduğunu qeyd etdi.   
    Tədbirdə Vətən müharibəsi qazisi, 3-cü qrup əlil Hüseynov Cavid Akif oğlu çıxış edərək bildirdi ki, Azərbaycan tarixinin şanlı səhifəsi olan 44 günlük Vətən müharibəsi nəticəsində 30 illik həsrətə son qoyuldu. Ordumuz işğal altındakı torpaqları düşməndən azad etdi. Tarix yazan qəhrəman Ordumuz, əsgər və zabitlərimiz Azərbaycanın haqq uğrunda mübarizə aparmaq əzmini, əsl döyüş ruhunu bütün dünyaya nümayiş etdirdi. 
   Müharibənin ilk günlərindən hərbi əməliyyatlarda  Füzuli, Cəbrayıl, Xocavənd rayonu istiqamətində düşmənə qarşı döyüşdüyünü və hərbi əməliyyatlar zamanı Xocavəndin azadlığı uğrunda gedən döyüşlərdə ağır yaralandığını qeyd etdi. Prezident cənab İlham Əliyevin müvafiq sərəncamları ilə “Vətən Müharibəsi iştirakçısı”, “Cəbrayılın azad olunması” və “Xocavəndin azad olunması” medallarlı ilə təltif olunduğunu bildirdi. 
  Sonra tədbir iştirakçıları Lökbatan qəsəbəsindəki Şəhidlər Xiyabanını ziyarət edərək, şəhidlərin məzarları önünə əklil və çələnglər qoydular. Ruhlarına dualar oxundu. 
    Sentyabrın 15-də Ermənistan silahlı qüvvələri tərəfindən törədilən genişmiqyaslı təxribatın qarşısı alınarkən Şəhid olmuş hərbiçimiz Quliyev Fərid Vahid oğlunun ailəsi ziyarət edildi.