Müzəffər Azərbaycan Ordusu şanlı tarix yazır...

   Azərbaycanın öz əzəli torpaqlarının azad edilməsi uğrunda apardığı haqq davasında qəhrəman ordumuz böyük mətanətlə mübarizə aparır və düşmənə ağır zərbələr endirir. Uzun illər əvvəl pozulmuş ədaləti bərpa etmək naminə biz öz torpağımızda vuruşuruq. Artıq ermənilər başa düşməlidir ki, Azərbaycan torpaqlarından çıxıb getməyin vaxtı çatmışdır. Möhtərəm prezidentimiz Ermənistanın sentyabrın 27-dən başlayan hərbi təxribatı zamanı yaralanan və Müdafiə Nazirliyinin Mərkəzi Hərbi Klinik Hospitalında müalicə olunan hərbçilərlə görüşündə bir daha qeyd etmişdir ki, erməni xalqı gərək öz rəhbərliyinin çirkin əməllərinin girovuna çevrilməsinlər. Bu gün öz hökumətini məsuliyyətə cəlb etsinlər. Öz övladlarını Azərbaycan torpaqlarına göndərməsinlər. Bizim əsgər və zabitlərimiz öz torpağında həlak olur, öz torpağında yaralanır və biz öz torpaqlarımızı azad edirik. Möhtərəm prezidentimiz İlham Əliyev cənablarının dəfələrlə qeyd etdiyi kimi bizi danışıqları bərpa etməyə dəvət edən dünya birliyi gərək izahat versin ki, erməni əsgərinin Azərbaycan torpaqlarında nə işi var. Ona görə də, döyüşlər erməni əsgəri Azərbaycan torpaqlarını tam tərk edənədək davam edəcək. Bizim ərazi bütövlüyümüzü təmin edib, tarixi ədaləti bərpa etməkdən başqa heç bir məqsədimiz yoxdur. Bildiyimiz kimi, hələ Tovuz döyüşləri zamanında əgər Azərbaycan ordusu istəsəydi döyüşü Ermənistan ərazisinə keçirərdi, lakin bunu etmədik. Çünki bizim öz torpaqlarımızdan başqa heç bir yerdə gözümüz yoxdur. Amma bütün bunlar Ermənistan rəhbərliyinə dərs olmadı ki, yenidən təxribat törətdilər və layiqli cavablarını aldılar. Artıq 30 ildir hər bir azərbaycanlının səbirsizliklə gözlədiyi günlər gəlib çatmışdır. Doğma Şuşamızda, Qarabağımızda üçrəngli bayrağımızın ən qısa zamanda dalğalanacağına heç kəsin şübhəsi yoxdur. Çünki hər bir Azərbaycan vətəndaşı bu qətiyyəti cənab prezidentimiz, Ali Baş Komandanımız İlham Əliyevin gözlərində görüb.
   Möhtərəm prezidentimizin hər bir çıxışı, hər bir bəyanatı düşmənin yuxularını ərşə çəkir, onların kabusu olmağa davam edir. Cənab prezidentimiz əvvəlki hadisələrdən heç bir dərs götürməyən erməniləri söz verdiyi kimi peşman etdi. Prezidentimizin bu qətiyyəti ordumuzun uğurlarında da öz əksini tapıb. Hər gün cəbhədən gələn xəbərlər ordumuzun qüdrətini göstərir. Döyüş texnikasını, hətta canlı qüvvə itkilərini belə döyüş meydanında qoyub qaçan erməni əsgərləri də reallığı çox yaxşı görə bilir. Qüdrətli Azərbaycan Ordusu qarşısında onların qaçmaqdan başqa heç bir çarəsi də yoxdur. Ermənistanın faşist ideologiyasına xidmət edən qorxaq və heç bir siyasi təcrübəsi olmayan baş naziri Nikol Paşinyan və onun həqiqi reallığı dərk etməyən başıpozuq komandası tərəfindən ermənistanın dinc sakinlərinə tuşlanan silahların gücü ilə döyüş meydanında saxlanılan erməni əsgəri qarşısında qəlbi vətən eşqi ilə döyünən Azərbaycan igidləri dayanıb.. Məhz buna görə də, ermənilər yalnız məğlubiyyətə düçar olur və onların Azərbyacan torpağında sərilmiş cəsədləri qalır. Ermənistanlı analar nə qədər gec deyil bu biabırçı vəziyyətə son qoyulması üçün Nikol Paşinyan rejiminə qarşı  ayağa qalxmalı, təcili müharibənin dayandılırmasını tələb etməli, illərlə əziyyət çəkib böyütdükləri övladlarının meyitlərinin ilana, qurda, quşa yem olmaması üçün övladlarının Dağlıq Qarabağda döyüşməsinə etiraz etməlidirlər. Eyni zamanda, nə qədər gec deyil, ölkələrinin yalançı, riyakar, korrupsiyaya uğramış, xalqın qanını soran, dırnaqarası demokratların vədlərinə inanmayıb təcili Dağlıq Qarabağı tərk etməlidirlər. Bu gün ölkəmizdə minlərlə, hətta on minlərlə oğullarımız Səfərbərlik və Hərbi Xidmətə Çağırış üzrə dövlət xidmətinin yerli bölmələrinə gedərək qəhrəman və müzəffər ordumuzun əsgərləri ilə birlikdə döyüşə qatılmaq istədiklərini bildirirlər. Çünki onlar öz doğma torpaqlarını sevirlər, haqq işi uğrunda döyüşdüklərini bilirlər. Ən əsası müqəddəs ana torpaqları uğrunda vuruşurlar. Azərbaycanın ərazisinin bütövlüyü uğrunda canlarını fəda etməkdən qorxmurlar.
   Azərbaycan ordusu Prezidenti cənab İlham Əliyevin komandanlığı altında tarix yazır. Şanlı Ordumuzun qəhrəman əsgər və zabitləri əsl vətənpərvərlik və igidlik nümunəsi göstərərək sürətlə irəliləyir, Füzuli və Cəbrayıl rayonlarının çox mühüm və strateji kəndlərini və yüksəkliklərini azad edir. Bütün bu sevindirici və qürurverici qələbələr tez bir zamanda bütün torpaqlarımızın azad ediləcəyindən xəbər verir. Bir sözlə, müzəffər Azərbaycan Ordusu qisa zaman kəsiyində qələbə tariximizin elan olunacaq günlərini yaxınlaşdırır.
   Bildiyimiz kimi, qalib Ordumuzun şəxsi heyətinin böyük əksəriyyətini gənclər təşkil edir və  onlar Vətənə layiq olduqlarınıı igidlikləri və qorxmazlıqları ilə sübut etdilər. Bütün Azərbaycan xalqı kimi mən də onlarla qürur  duyuram və QƏLƏBƏMİZ mübarək olsun deyirəm. Eyni zamanda, intellektual gənclərimizə üz tutub deyirəm: Bacardıqca informasiya savaşında da  cəbhədəki kimi fəal olsunlar. Xarici dilləri mükəmməl bilən gənclərimiz erməni yalanını və iftirasını dayandırmaq üçün dünyanın aparıcı kütləvi-informasiya vasitələrində müzakirələrdə fəal iştirak etsinlər. Cünki, xarici ölkələrdə yaşayan və illərlə orada köksalan erməni lobbisi artıq dünyanin aparıcı ökələrində, o cümlədən, ABŞ-da ölkəmizin əleyhinə yalan təbliğat aparmaqla ABŞ senatının bir qrupunu ələ alaraq ölkəmizin əleyhinə qətnamə hazırlanıb (1165 nömrəli) təsdiq ediməsi üçün ciddi fəaliyyətə başlamışlar. İnanıram ki, düşmənin bu canfəşanlığı baş tutmayacaq və xalqımızın haqq işi tezliklə qalib gələcəkdir.
   Ermənistan ordusunun qaniçən cəlladları məğlubiyyətin acısını dadan kimi ölkəmizin şəhərlərini, rayon və kəndlərini, mülki obyektləri və dinc əhalini hədəfə aldıqları, günahsız insanları, o cümlədən qocaları, məktəbliləri öldürdükləri və yaraladıqları halda, yalandan hay-küy qaldıraraq guya Azərbaycan Ordusu onların mülki əhalisini hədəfə alır və yaşayış məntəqələrini dağıdır, Azərbaycan Qarabağı işğal etmək istəyir. Bu yalanları Fransada yaşayan ermənilər vasitəsilə bu ölkənin Prezidenti Emmanuel Makrona çatdıran və onu inandıranlar Fransa rəhbərini çox pis və gülünc vəziyyətə salıblar. Azərbaycan Prezidenti İlham Əliyevə telefonla zəng edən Fransa lideri açıq şəkildə beynəlxalq qanunları tapdaladıqlarını və Fransanın ATƏT-in həmsədri kimi yalnız faşist Ermənistanı müdafiə etdiklərini bariz şəkildə nümayiş etdirdi və lider Avropa ölkəsi olan Fransa dövlətinin məkrli siyasət yürütdüyünü nümayiş etdirdi. Dövlətimizin başçısı qətiyyətlə bildirdi ki, Azərbaycan öz əzəli torpaqları uğrunda döyüşür, heç bir dövlətin torpağında gözü yoxdur, yeganə məqsəd ölkəmizin ərazi bütövlüyünü bərpa etmək, doğma Vətənindən didərgin düşmüş azərbaycanlıların öz dədə-baba yurdlarına qayıtmasını, orada rahat yaşamasını və dağıdılmış torpaqlarımızı yenidən qurmaq və inkişaf etdirməkdir. Ona görə də Makron bilməlidir ki, Ermənistan silahlı qüvvələri Azərbaycan torpaqlarını çox qısa zaman kəsiyində tam, dərhal, qeyd-şərtsiz tərk etdikdən, Azərbaycan Silahlı Qüvvələri müqəddəs və əzəli torpaqlarımızda yerləşdikdən sonra Vətən müharibəsi dayandırıla bilər və sülh danışıqlarına başlamaq olar. Bu gün ölkəmizdə minlərlə, hətta on minlərlə oğullarımız könüllü olaraq hərbi komissarlıqlara gedərək qəhrəman və müzəffər Ordumuzun əsgərləri ilə birlikdə döyüşə qatılmaq istədiklərini bildirirlər. Çünki onlar öz doğma torpaqlarını sevirlər, haqq işi uğrunda döyüşdüklərini bilirlər. Ən əsası, müqəddəs ana Vətən torpaqları uğrunda vuruşurlar. Azərbaycanın ərazisinin bütövlüyü uğrunda canlarını fəda etməkdən qorxmurlar. Onlar tam əmindirlər ki, tez bir zamanda doğma vətənimiz Azərbaycanın əzəli torpaqlarını düşmən tapdağından azad edəcək və üçrəngli müqəddəs bayrağımız bu əzəli torpaqlarda əbədi dalğalanacaqdır. Vətən nisgilinə və həsrətinə son qoyulacaq, bütün şəhidlərimizin göylərdə gəzən narahat ruhları rahatlıq tapacaqdır.

Səbinə Xasıyeva, 
Milli Məclisin deputatı