1 iyun Uşaqların Beynəlxalq Müdafiəsi günüdür

   Uşaqlar bəşəriyyətin sabahı, bizim gələcəyimizdir. Bütün bəşəriyyət malik olduqlarının ən yaxşısını uşaqlara verməyə borcludur.
    Hər bir dövlət, hər bir cəmiyyət gələcəyimiz olan uşaqların qayğısına qalmağı, onların fiziki və mənəvi cəhətdən böyüməsini təmin etməyi özünün ən ümdə vəzifələrindən biri hesab edir. Bu gün müstəqil Azərbaycan dövləti də bu mühüm məsələyə çox böyük qayğı ilə yanaşır.
    31 may 2019-cu il tarixində Heydər Əliyev Fondunun dəstəyi və Qaradağ Rayon İcra Hakimiyyətinin təşkilatçılığı ilə Qaradağ rayonu, Lökbatan qəsəbəsindəki Heydər Əliyev Parkında 1 iyun - Uşaqların Beynəlxalq Müdafiəsi günü  münasibəti ilə Sağlamlıq İmkanları Məhdud Uşaqlar üçün 9 nömrəli internat məktəb və Lökbatan qəsəbəsindəki 6 nömrəli Uşaq Somatik Sanatoriyasının uşaqları, eləcə də rayonun aztəminatlı ailələrinin uşaqları üçün bayram şənliyi keçirildi.
  Tədbirdə Qaradağ Rayon İcra Hakimiyyəti başçısının birinci müavini cənab Emil Abbasov,  Qaradağ Rayon İcra Hakimiyyətinin başçısı yanında Şuranın üzvləri, rayon icra hakimiyyətinin məsul işçiləri iştirak edirdilər.
    Tədbiri giriş sözü ilə açan Qaradağ Rayon İcra Hakimiyyəti başçısının birinci müavini cənab Emil Abbasov çıxış edərək bu gün ölkəmizdə uşaq və yeniyetmələrə, gənclərə göstərilən diqqət və qayğının, onlara yaradılan hərtərəfli şəraitin dövlət siyasətinin prioritet istiqamətlərindən biri olduğunu vurğuladı. Qeyd etdi ki, Ulu Öndər Heydər Əliyev bu sahəyə xüsusi diqqət ayırmış, uşaq və yeniyetmələrin sağlam və bilikli böyümələri yönündə çoxsaylı tədbirlər həyata keçirmiş, müxtəlif  beynəlxalq konvensiyalara qoşulmuş, müvafiq fərman və sərəncamlar imzalamışdır. Əsası ümummilli lider Heydər Əliyev tərəfindən qoyulmuş və Möhtərəm Prezidentimiz cənab İlham Əliyevin uğurla davam etdirdiyi bu siyasət artıq milli strategiya kimi formalaşmışdır. Bu siyasətin davamı olaraq son illərdə Azərbaycan Respublikasının Prezidenti cənab İlham Əliyev və Azərbaycan Respublikasının Birinci vitse-prezidenti Mehriban xanım Əliyevanın uşaqlarla bağlı məsələlərə xüsusi diqqət yetirmələri həmin sahəyə qayğının daha da artmasına səbəb olmuşdur.   Heydər Əliyev Fondunun uşaqların intellektual və fiziki inkişafında həyata keçirdiyi mühüm layihələrin rolu danılmazdır.
   Daha sonra tədbir bayram konsert ilə davam etdirildi. Cizgi film personajlarının, nağıl qəhrəmanlarının şən zarafatları, rayonda fəaliyyət göstərən 7 nömrəli Uşaq Gənclər İnkişaf Mərkəzinin, uşaq bağçalarının və digər kollektivlərin çıxışları bayram ovqatını daha da artırdı. Rəqslərə qoşulan, məharətlərini göstərən uşaqların sevinci hədsiz idi.
    Tədbirin sonunda  Heydər Əliyev Fondu tərəfindən uşaqlara bayram hədiyyələri təqdim olundu.