Qaradağ rayonunda “Bilik günü” qeyd edilmişdir
“Bilik günü” münasibəti ilə Qaradağ rayonu ərazisində yerləşən bütün təhsil müəssisələrində tədbirlər keçirilmişdir.Qaradağ Rayon İcra Hakimiyyəti aparatının məsul işçiləri bu tərdbirlərdə iştirak etmişlər.
Qaradağ Rayon İcra Hakimiyyətinin Başçısı cənab Süleyman Mikayılov, Milli Məclisin deputatı Aydın Hüseynov Qızıldaş qəsəbəsindəki bu tədris ili ərəfəsində əsaslı təmir olunmuş Azər Namazov adına 180 nömrəli tam orta məktəbində keçirilən “Bilik Günü” mərasimində iştirak etmişdir. Rayon rəhbərliyinin yaxından iştirak etdiyi tədbirdə məktəb müəllimlərinin, şagird heyətinin, valideynlərin və birincilərin sevinci hədsiz idi.
İlk öncə Azərbaycan Respublikasının Dövlət Himni səsləndi.
Rayon İcra Hakimiyyətinin Başçısı cənab Süleyman Mikayılov məktəb kollektivi qarşısında çıxış edərək, yeni dərs ilinin başlanması münasibətilə təbrik etmiş, onlara gələcək tədris illərində uğurlar diləyərək hər birinin gələcəkdə dövlətimiz, cəmiyyətimiz üçün savadlı və yararlı vətəndaş olaraq yetişmələrini arzulamışdır. Azərbaycan xalqının ümummilli lideri Heydər Əliyevin təhsilin inkişafına, müəllimlərə həmişə böyük diqqət və qayğı ilə yanaşdığını, bu işi dövlət siyasətinin mühüm bir sahəsi hesab etdiyini vurğuladı. Cənab başçı qeyd etmişdir ki, bu ilki “Bilik günü” Bakının erməni-bolşevik işğalından azad edilməsinin 100 illiyinə təsadüf edir. Bu da xalqımız üçün ikiqat bayramdır.
Qeyd edilmişdir ki, ötən tədris ili Qaradağ rayonu üçün uğurlu olmuşdur. 2017-2018-ci tədris ilində Qaradağ rayonu üzrə orta məktəbi bitirmiş məzundan 604 nəfəri ali məktəblərə qəbul olmuşdur ki, bu da sənəd verənlərin 67,4 faizini təşkil edir. Məlumat üçün bildiririk ki, 2016-2017-ci tədris ilində Qaradağ rayonu üzrə bu rəqəm 62,7 faiz təşkil etmişdir. 2017-2018-ci tədris ilində 600-dən yuxarı bal toplayanların sayı isə 42 nəfər olmuşdur. Fərəhləndirici haldır ki, bu rəqəm ilbəil artır.
Aydın Hüseynov öz çıxışında təhsil sahəsində ölkəmizdə aparılan böyük islahatlardan və tərəqqidən danışmışdır.
“İlk zəng”in səslənməsi ilə yeni dərs ilinə başlanıldı. Qeyd etmək lazımdır ki, ötən illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramlarının uğurlu icrası nəticəsində rayon ərazisində bir neçə təhsil ocağı əsaslı təmir olunmuş, yeni tədris korpusları inşa edilərək istifadəyə verilmişdir. Hal-hazırda bu istiqamətdə işlər davam etdirilməkdədir. Bakı Şəhər İcra Hakimiyyəti tərəfindən Qaradağ rayonu Qobustan qəsəbəsində Azad Rzayev adına 223 nömrəli məktəb də əsaslı təmir olunmuşdur. Bundan başqa Heydər Əliyev Fondunun təşəbbüsü ilə yeni tədris ili ərəfəsində rayonumuzun imkansız, maddi durumu ağır olan ailələrinin orta ümumtəhsil məktəblərində təhsil alacaq 150 nəfər məktəbliyə yeni məktəbli formaları, 156 nəfər birinci sinif şagirdinə çantalar və məktəb ləvazimatları təqdim olunmuşdur.
